pirmdiena, 8. marts, 2021Vārda diena: Dagmāra, Marga, Margita
crest1 crest2

Dzymtos volūdys dīna

Pievienots: 23.02.2021

Muna dzymto ir latgalīšu volūda, kū lītoju kotru dīnu i sātā, i dorbā, i cylvākūs, kur mani saprūt. Saīt latgalīts nu dzimšanys pa šai dīnai. Vuicejūs Izvoltys vydusškolā, i sovā storpā mes runovom tikai latgaliski, nabeja nu svora - voi tāvs ar moti nu kolhoza voi školotoji. Nu savys volūdys nikot naasu kaunējīs voi atsasacejīs. Varbyut par tū, ka munā školā vuicejos pyrmos latgalīšu popularzynotniskos gromotys „Pauiceišana i vysaidi sposoby deļ latvīšu zemnīka” autors Jezups Macuļevičs, a varbyut par tū, ka munu školu beigusi myusdīnu latgalīšu volūdys i kulturvēsturis pētneice i latgalīšu ābecis leidzautore Lideja Leikuma.

Attīksme pret Latgali, latgalīšu volūdu ir cīš dažaida – vīni tī radz  vērteibu, citi nūraidūši, izatur ar ignoranci. Par itū Ontons Zvīdris pyrms 30 godym raksteja:

„Mādz cylvāks pasalīleit ar tū, kū zyna

Dažs myusu dīnos līlejās, ka nasaprūt latgalīšu volūdu.

Ai broli, broli, tautys broli, tei poša nataisneiba, grāks saēss tevi pošu. ”

Es vēļ nasoku raksteit dzejūļus, bet latgalīšu dzejnīkus i rakstnīkus paskaitu, cik nu laiks ļaun. I klasiķus, i jaunūs. Maņ lels prīks par ģimnazistym, ar kurim var pormeit kaidu vordu latgalīšu volūdā.

Vysūs laikūs školys bārni vairok voi mozok ir vuicejušīs Raini – eistajā vordā Juoņi Plīkšānu. Tod nūslāgumā sveicīns nu Juoņa Plīkšāna, kas tyka publicāts pyrms 100 godym:

Sveicins latgalīšim.

Jyus muni dorgi broli, latgalīši,
Mes otkon sasanādzam rūku rūkos,
Kas šķērti myužam dvesom mūku mūkos,
Nu šķēršļus laužūt, plyustam kūpā teiši.
Lai jauno straume – tei, kas kūpā voda!
Lai aiznest naida sorņus viņai veicas!
Lai jauno meila jaunu dzeivi roda!
Tai pornokūt nu svešnīceibys toli,
Mes svineibos i dorbūs byusim broļi.

Juoņs Tukāns, Kroslovys Vaļsts ģimnazejis direktors


Jauna aptauja

Marts - 2021
P O T C P S S
01
02
03
04
05
06 07
08
09 10 11 12 13 14
15 16 17 18 19 20 21
22 23 24 25 26 27 28
29 30 31  

Dienas foto

  • Pavasaris jau tuvojas. (Ingas Pudnikas foto)

2015. Copyright © Krāslavas vēstis. All rights reserved.
webbuilding.lv mājas lapu izstrāde